الفيديو التعريفي قريباً
رحلتي
البداية — من كراجات الهملة
القصة بدأت بسلك هاند بريك. سكراب صغير يبيعه بثلاثة دنانير وطلع غلط، وسكراب ثاني يبيعه بعشرة مستعمل، بينما الوكالة تجيبه جديد من الإمارات بدينارين ونص. يومها سألت نفسي: ليش ما في مكان واحد يجمع كل هالسكرابات ويخلي الناس تقارن وهي في بيتها؟
سكراش — 12 سنة من الدروس
حوّلت الفكرة لمشروع تخرج اسمه "يلا سكراب"، ثم صار شركة حقيقية باسم سكراش. حصلت على استثمار، دعم من تمكين، ظهرت في تلفزيون البحرين. بنيت تطبيقاً استغرق 450 يوماً بدل 80. واجهت مشاكل تقنية، اتصالات الفجر، وزيادة 26 كيلو من الجلوس أمام الشاشة 14 ساعة يومياً.
الأثر — ما يُقاس بغير الأرقام
سكراش غيّر حياة ناس. واحد من المشترين كان يطلّع رزقه من حاوية القمامة — بعد سكراش صار يشتري سكراب من كل البحرين وهو في بيته. أكثر من 1,400 صفحة مرّت عبر المنصة. وحين أغلقتها، وصلتني رسائل تقول: "مو على كيفك تقفل بيوتنا!"
حوش خليفة — الفصل الجديد
كل درس تعلمته في 12 سنة حطّيته هنا. حوش خليفة هو المكان اللي أشارك فيه تجاربي الحقيقية — بدون تنظير ولا كلام فاضي. كتب من قصتي، دورات من خبرتي، ومحتوى مبني على أخطاء دفعت ثمنها من جيبي وصحتي وعلاقاتي.
بالأرقام
وش حوش خليفة؟
حوش خليفة مو مدونة نصائح ولا قناة تحفيز. هو مشروع محتوى عربي مبني على قاعدة وحدة: محتوى حقيقي من تجارب حقيقية.
كل كتاب هنا مكتوب من شخص عاش القصة بنفسه. كل درس مبني على خطأ حقيقي كلّف وقت ومال وصحة. ما تلقى هنا كلام منسوخ من كورسات أجنبية أو نصائح نظرية — تلقى تجارب خام، بلغة بسيطة، من شخص يؤمن أن البساطة تصنع المعجزات.
هدفي إنك تختصر 12 سنة من الأخطاء إلى عدة أسابيع من القراءة والتعلم. هذا اللي تمنيت يكون موجود حين بدأت، وهذا اللي أبنيه اليوم عشانك.